MUSIKKHÚS SÍÐANI 1959
í 1959 opnaði Simme Arge Jacobsen á fyrsta sinni sølubúð á Landavegnum, har hann seldi plátur og tónleikaútgerð, og lærdi frá sær. Seinni flutti Simme Musikkhús heim í býin, har hann húsaðist í Steinatúni á horninum millum Niels Finsensgøtu og Bøkjarabrekku. Her bar til at lurta eftir grammofonplátum, og at spæla uppá og royna ymisk ljóðføri, eitt fantastiskt umhvørvi, har nógvir ungdómar hildu til.
ALDARSKIFTIÐ EIN RING TÍÐ
Seinni flutti Simme oman aftur í Niels Finsensgøtu við Bókasavnið – ella í Jotoholið, sum tað eisini varð kallað. Handilin helt eisini til í bæði SMS og uppi á Hálsi í hesum tíðarskeiðinum.
Nakað áðrenn aldarskiftið hevði Simme valt at selja Simma Musikkhús. Hetta gekk tó ikki eftir vild, tí ikki langt eftir hetta máttu nýggju eigarnir staðfesta, at teir fingu ikki raksturin at ganga. Simme valdi tí sjálvur at taka yvir aftur handilin, og í 2004 fekk Simme nýggjar kreftir uppí raksturin. Petur Magnus Bjarnastein ynskti at keypa handilin, og eftir at hava arbeitt saman við Simma í handlinum í eitt ár keypti Petur Magnus Simma Musikkhús í 2005. Handilin flutti tá eisini í nýggj hølir í Lucas Debesargøtu, har handilin helt til í 14 ár, heilt fram til 2019.
EIN NÝGGJ TÍÐ FYRI FRAMMAN
Eftir at hava hildið til í somu hølum í 14 ár valdi Petur Magnus at byggja nýggj hølir til handilin, sum vórðu gjørd eftir teimum karmum, sum ein musikhandil krevur. í 2019 stóð nýggi bygningurin á Karlamagnusarbreyt 18 í Hoyvík liðugur, og flutti Simme Musikkhús sama ár niðan í nýggja bygningin.
NÝGGJUR EIGARI
Eftir at hava átt og rikið handilin í 19 ár, valdi Petur Magnus í 2024 at selja handilin víðari. Hesuferð var tað Terje B. Vestergaard, sum yvirtók handilin, og sum í dag eigur og rekur Simma Musikkhús.
