Um okkum

Simme Musikkhús er ein gomul fyritøka, sum Simme Arge Jacobsen stovnaði í 1959.
Tað munnu verða nógvir tónleikarar gjøgnum árini, sum hava handlað gjøgnum Simma, og fingið góða tænastu. Um ein lurtar eftir tónleikasendingum, verður Simme ofta nevndur fyri at hava verið ein sera lagaligur handilsmaður.
Í 2005 gjørdi Simme av at selja handilin, hann var farin at eldast og helt at tíðin var komin har yngri kreftir kundu taka yvir, og føra handilin víðari.
Petur Magnus Bjarnastein yvirtók Simma Musikkhús í desembur 2005. Petur Magnus Bjarnastein er mest kendur sum guitarbyggjarin handan navnið Bjarnastein guitars, eins og hann eisini er kendur fyri at umvæla ymisk ljóðføri, kanska serliga guitarar og bassar.
Simme Musikkhús er í dag ein handil við sera breiðum og stórum úrvali av ljóðførum og tónleikaútgerð. Eisini er eitt verkstað tengt at handlinum, har umvælingar verða gjørdar. Petur Magnus hevur eisini eitt størri verkstað aðrastaðni, har framleiðslan av Bjarnastein guitars fer fram, eins og tær størru og meira umfatandi umvælingarnar verða gjørdar.
Handilin hevur gjøgnum árini hildið til ymsa staðni í býnum. Í dag heldur handilin til í Lucasdebesargøtu 8, beint aftan fyri Auto.

Simme Musikkhús søkir eftir sølulærlingi

Lagt út: 27. Desember 2024 | Umsóknarfreist: 31. Januar 2025

Hevði tú kunna hugsað tær at arbeitt við tónleiki hvønn dag? Nú hevur tú møguleikan!

Simme Musikkhús søkir nú eftir sølulærlingi til okkara musikkhandil á Karlamagnusarbreyt 18 í Hoyvík.

Tínar uppgávur verða millum annað at:

  • Hjálpa við tí dagliga handilsvirkseminum í handlinum, so sum at taka fyri, prísa vørur, taka móti vøru og tílíkt.
  • Hjálpa okkara kundum við øllum viðkomandi spurningum.
  • Hjálpa til á ljóðføris-verkstaðnum, tá tørvur er á tí.
  • Seta ljóðførir upp í handlinum, so tey eru klár at royna hjá okkara kundum.
  • ..og annað fyriliggjandi handilsarbeiði.

Vit vænta av tær, at tú ert fyrikomandi, hevur áhuga fyri tónleiki og ljóðførum, og ynskir at veita okkara kundum bestu tænastuna. Tað er ikki ein treyt at tú hevur arbeitt í handli ella við ljóðførum fyrr.

Send okkum tína umsókn á simme@simme.fo saman við eitt sindur av kunning um teg. Vit gleða okkum at frætta frá tær!

Umsóknarfreist er 31. Januar 2025. Um skikkaður umsøkjari verður funnin áðrenn, kann starvið verða sett áðrenn ásettu freist.